СҚО жұмыс сапарымен «Өрлеу» БАҰО Басқарма Төрағасы Әсел Мұхаметжанова келді. Ол Қозыбаев университетіне де ат басын бұрып, ЖОО басшылығымен кездесу барысында ынтымақтастық туралы екі жақты меморандумға қол қойылды. Бұл құжат орта, кәсіптік-техникалық және жоғары білім беру қызметкерлерінің біліктілігін арттыруға және кәсіби шеберлігін жетілдіруге үлкен мүмкіндік бермек.
Енді «Өрлеу» БАҰО педагогтары ЖОО-ның қайта даярлау және біліктілікті арттыру институтында қосымша курстардан өтіп, студенттердің дипломдық жобалары мен педагогикалық практикасының бірлескен жетекшісі бола алады. Біздің оқытушылар өз кезегінде олардың базасында білім беру технологиялары саласындағы құзыреттіліктерін арттыратын болады.
Айта кетейік, Қозыбаев университетінің қайта даярлау және біліктілікті арттыру институты өңірдегі білім берудің негізгі әдістемелік орталықтарының бірі болып табылады. Қазіргі уақытта тіпті біліктілікті арттыру курстарынан өту екінші жоғары біліммен тепе-тең болуда.
Меморандум арқылы екі жақты келісім одан әрі нығая түспек. Құжат білім беру саласы қызметкерлерінің біліктілігін арттыру мен кәсіби шеберлігін одан әрі жетілдіру бойынша білім мен тәжірибе алмасуды көздейді.