Бүгін Қозыбаев университеті студентіміз, 2026 жылғы Паралимпиада ойындарының жеңімпазы және жүлдегері, университетіміздің абыройын асқақтатқан Ербол Хамитовқа құрмет көрсетіп, чемпионды қарсы алды. Жастар жеңімпазға Паралимпиада жарыстарына қатысу туралы, түрлі қиындықтарды еңсеру жайында сұрақтар қойды. Бүгін спортшымызға магистратурада оқуға грант берілді. Ерболдың жүріп өткен жолы- қайсарлық пен нағыз ерліктің үлгісі. Жеңіске деген шексіз құштарлығы, тынымсыз жасаған жаттығулары мен маңдай тері оны әлемдік деңгейдегі биік белестерге жетеледі. Басқарма Төрағасы- Ректор Ербол Исақаев чемпионды құттықтады: «Ербол алтын медаль жеңіп алған кезде Ғылым және жоғары білім министрі, университет ректорлары өз құттықтауларын жолдады. Жаттықтырушыларға өте ризамын! Кәсіби спорттағы жеңіс әрқашан да ерекше құнды болады. Ербол біздің университетімізді өте жоғары деңгейге көтерді!». Ербол Қозыбаев университетінде «Дене шынықтыру және спорт» мамандығы бойынша 4 курста оқиды. Оның табандылығы, еңбекқорлығы және өзіне деген сенімділігі студенттер үшін жарқын үлгі. Спортшы, студент-жастарға  жігерлі үндеуін жеткізді: « Бірнеше ай бұрын мен Мемлекет басшысымен кездестім. Сол кездесуден кейін бүкіл ел алдында жеңіске жетем деп уәде бердім. Ең алдымен мені қолдаған барша жандарға, бапкерлеріме алғысымды білдіремін. Осылайша менің арманым орындалды. Еліміздің көк туы желбіреп, әнұраны шырқалды. Алға қойған жаңа мақсаттарымды орындау үшін барымды саламын. Дұрыс жолдан таймай, биік белестерді бағындыруға тырысыңыздар». Екі тәлімгері де Қазақстан пара-шаңғы спорты және парабиатлон ұлттық құрамасының аға жаттықтырушысы Антон Жданович пен жаттықтырушы Аслан Тоқбаев университетіміздің түлектері. Ербол Хамитов – біздің университетіміздің ғана емес, бүкіл еліміздің мақтанышы! Асуларыңыз биік болсын. Біз сізбен мақтанамыз!

Қозыбаев университеті мен Сәбит Мұқанов атындағы қазақ сазды-драма театры ынтымақтастық туралы меморандумға қол қойды. Оның мақсаты мәдени ынтымақтастықты дамыту, жас ұрпақ арасында ұлттық дәстүрлерді нығайту, сондай-ақ студенттерді отандық және шетелдік авторлардың әйгілі шығармалары арқылы аймақтың рухани өміріне баулу. Серіктестіктің негізгі мақсаты - театр ғимаратында университетке қатысты іс-шараларды ұйымдастыру болып табылады. Тараптар бірлескен шараларды өткізуді қолдап отыр. Өз кезегінде білім алушылар театр актерлерімен және қазақстандық, шетелдік режиссерлермен шеберлік сабақтарына, шығармашылық кештерге қатысуға мүмкіндік алады. Ынтымақтастық аясында алдағы уақытта студенттеріміз айына бір қойылымды тегін тамашалай алады.

Қозыбаев университетінде ЖИ және цифрлық трансформация орталығының базасында SKO-Hub-пен бірлесіп «IDEA BATTLE» стратап-жобалар байқауы өтті. Оған 10 команда- университетіміздің студенттері, мектеп оқушылары, сондай-ақ SKO Hub резиденттері қатысты. Қатысушылар бизнес, медицина, тілдерді үйренуге арналған IT-идеяларын, банктерге арналған алаяқтыққа қарсы мониторинг жүйесін, желідегі алаяқтықты талдауға арналған  IT-шешімді және т. б. ұсынды. «Idea Battle- студенттердің батыл ойлары мен шешімдерін нақты технологиялық бизнеске айналдыратын «инновациялық лифт». Ел мен әлем үшін ең жақсы IT шешімдері қаламызда, іргелі білім мен нарықтық ортада дәлелдеу мүмкіндігіміз бар», -деді ұйымдастырушылар. Қатысушылардың жұмысын тиісті мемлекеттік құрылымдардан, нақты бизнес өкілдері мен цифрлық-сарапшылардан, нейрожелілер бойынша мамандардан, ЖОО оқытушылары мен студенттерінен құралған қазылар алқасы бағалады. Жеңімпаздар: 1 орын –Жаратылыстану-математика бағытындағы Назарбаев Зияткерлік мектебінің командасы Петропавл қ. Оқуға түсу және тағылымдамадан өту үшін жоғары оқу орындарын таңдау бойынша талапкерлерге арналған «EDU WAY» жобасы. Бұл жағдайда талапкер іздеу жүйесінде өзіне қажетті параметрлерді енгізеді, ал сайт тиісті ұсыныстар береді (таңдау және кеңес беру үшін жасанды интеллект қолданылады). 2 орын– Қозыбаев университеті  студенттерінің тобы «Power NODE» жобасы- құрылғыларды зарядтауға арналған қалдық материалдардан батарея-аккумулятор жасау бойынша (коммерцияландыруға арналған жоба).Команда құрамында Т–25 тобының студенті Мадина Жұмабаева және ИСУ (KZ-US)-24-2 тобындағы Александр Кадуцкий. 3 орын-SKO HUB резиденттер тобы «Bee Vision» ақылды ара ұясының жобасын ұсынды. Модельде ұя параметрлері, температурасы, аралардың күйі, бал құрамы  көрсетілген. Балалар естелік сыйлықтар мен дипломдар алды. Қатысушыларды құттықтаймыз! Батыл идеялар мен тәжірибе арқылы  жаңа жетістіктерге жетіңіздер!

Қозыбаев университетінің әскери кафедрасының студенттері үшін «Полигон» страйкбол клубының ойын алаңы базасында тактикалық дайындық бойынша жаттығу сабақтары өткізілді. Іс-шараға «Аумақтық қорғанысты жоспарлау және ұйымдастыру», «Ұйымдастырушылық-жұмылдыру жұмысы» мамандықтары бойынша 18 білім алушы қатысты. Олар атыс қаруын қолдана отырып, қалалық жағдайларда жақын қашықтықтағы жаттығуларды жасады. Мұндай сырттай оқу-жаттығу жиыны алғаш рет өткізіліп отыр. Университеттің әскери кафедрасында барлығы 162 студент оқиды, оның ішінде 8 қыз бар. Оқуға түсуге өтініштер 1 ақпаннан бастап қабылданады, іріктеу 2026 жылдың қазан-қараша айларында өтеді.

Бұл оқу залы, білім алу  және ғылыми-зерттеу үшін заманауи әрі жайлы кеңістік. Енді әрбір студент пен оқытушы қазақ әдебиетінің, мәдениеті мен ғылымымен таныса алады. Оқу залында мемлекеттік тілдегі әдебиеттердің кең ауқымы ұсынылған.  Атап атйқанда: оқу және ғылыми басылымдар, көркем әдебиет, классиктер мен заманауи авторлардың шығармалары бар. Әсіресе, Абай Құнанбаев, Ахмет Байтұрсынов, Мағжан Жұмабаев сыңды ұлы ойшылдар мен жазушылар, сондай - ақ біздің көрнекті жерлестеріміз - Ғабит Мүсірепов пен Сафуан Шаймерденов, Сәбит Мұқановтың туындылары ерекше орын алады. Шараға оқытушылар, қадірлі қонақтар және кітапхана оқырмандары қатысты. «Қазақ тілі мен әдебиетінің» кафедра меңгерушісі Жазира Көкбас бұл игі бастаманы алдағы уақытта жалғастырып, әрі қарай дамыту әрбір азаматтың іс-әрекетіне байланысты екенін атап өтті : « Университет басшылығы әрдайым оқытушылармен студенттер үшін қолайлы жағдай жасайды. Осы ұлы жолды өркендету біздің парызымыз деп білемін. Мемлекет басшысының «Абай және ХХІ ғасырдағы Қазақстан» атты жарыққа шыққан мақаласы– үлкен қадам.  Сондықтан жастарға айтарым, өмірде дұрыс жол іздесеңіздер Абай жолынан, Абайдың қара сөздерінен міндетті түрде табасыздар». Университеттің кітапхана қорында мемлекеттік тілдегі 141 мыңнан астам кітап бар. «Бұл кеңістікті студенттерге мемлекеттік тіл мен қазақ әдебиетін насихаттау үшін ашып отырмыз. Енді біздің алдымызда-орталықты мүмкіндігінше көп кітаптармен толықтыру және компьютерлермен жабдықтау міндеті тұр»,- деп атап өтті Басқарма Төрағасы-Ректор Ербол Исақаев. Жаңа ашылған оқу залы студенттер мен оқытушыларға рухани шабыт береді.

Петропавлдағы Сәбит Мұқанов атындағы облыстық әмбебап ғылыми кітапханасында әдеби қауымдастық мүшелеріне СҚО әкімінің стипендияларын табыстау рәсімі өтті. Бұл рәсім мәдениет пен ұлттық дәстүрлерге арналған Наурызнамның онкүндігінің үшінші күні өткізілді. Іс-шара аймақтық әдебиетті қолдау және дамыту, дарынды жазушыларды, ақындарды және әдебиет қайраткерлерін ынталандыруға бағытталған. Салтанатты рәсім барысында  өңірдің әдеби шығармашылығы мен мәдени өмірін дамытуға елеулі үлес қосқан  авторлар марапатталды. Облысымыздан бес азамат таңдалып, әрқайсысына 500 мың теңгеден сертификаттар табысталды. Солардың бірі Қозыбаев университетінің профессоры Зарқын Тайшыбай болды.   Зарқын Сыздықұлы - Қазақстанның еңбек сіңірген қайраткері, академик, еңбек ардагері, белгілі ғалым және жазушы, СҚО Құрметті азаматы. 2000 жылдан бастап Қозыбаев университетінде «Журналистика және әлеуметтік ғылымдар» кафедрасының студенттеріне сабақ береді, Этномәдени зерттеулер ғылыми орталығын басқарады. Ғалымның тікелей қолдауымен 2001 жылы университетте журналистика мемлекеттік тілде оқытыла бастады. Ол Қазақстан тарихы мен мәдениеті бойынша 200-ден астам ғылыми мақала, 12 оқу құралы және 11 монография жазған. Профессордың еңбек жолы жастарды білімге ұмтылуға, мәдени құндылықтарды сақтауға және елдің дамуына үлес қосуға шабыттандырады. Зарқын Сыздықұлын лайықты марапатымен шын жүректен құттықтаймыз! Сізге мықты денсаулық, ұзақ өмір, жаңа ғылыми жетістіктер және шабыт тілейміз. Оның даналығы мен тәжірибесі болашақ ұрпақ үшін әлі талай жылдар бойы бағыт-бағдар береді!

Наурызнама онкүндігі аясында Шаңырақ күнін мерекелеуге арналған «Отбасы Talks» шарасы өтті. Жиын отбасылық құндылықтарды нығайтуға, ұрпақтар арасындағы ашық диалогты дамытуға және қазіргі қоғамдағы отбасының рөлін талқылауға бағытталған. Ашық диалог алаңында қатысушылар өздерінің жеке өмірлік тәжірибелерімен, отбасылық дәстүрлер мен тәлім-тәрбие туралы пікірлерімен бөлісті. Шараны Петропавл қаласындағы Назарбаев Зияткерлік мектебінің тарих пәнінің мұғалімі Дилбар Бегалина және Қазақстан халқы Ассамблеясының кафедра меңгерушісі Людмила Гривенная жүргізді. Қонақтар отбасылық құндылықтар, өзара қолдау, балаларды тәрбиелеу және отбасылық татулықты сақтау туралы жеке әңгімелерімен бөлісті. Тыңдаушылар 50 жылдан астам отбасылық өмір тәжірибесімен бөліскен Никифоров Александр Владимировичтың әңгімесін ерекше ықыласпен зейін қойып тыңдады. Кездесу барысында студенттер қатысушылар мен сарапшыларға сұрақтар қойып, адам өміріндегі отбасының рөлі туралы талқылады. Сарапшылар отбасылық қарым-қатынас және психологиялық қолдау бойынша кәсіби көзқарастарын білдірді. Ермек Серкебаев атындағы өнердегі дарынды балаларға арналған мамандандырылған мектеп-интернатының оқушылары өнер көрсетті. Шара соңында қонақтарға, сарапшыларға және әртістерге алғыс хаттар мен естелік сыйлықтар табысталды.

Қозыбаев университетіне Түркияның Балыкесир университетінің ассистент-профессоры, арнайы білім беру саласындағы философия  докторы  Экер Абдуллах келді. Енді Экер Абдуллах  Қозыбаев университетінде жұмыс істейді. Ол «Арнайы педагогика және инклюзивті тәжірибе» қос дипломды бағдарламасы бойынша 2-3 курс студенттеріне сөйлеу терапиясы және арнайы білім беру бойынша сабақ береді. Бағдарлама аясында  студенттерге сабақтар, тәжірибеге бағытталған курстар өткізеді. Сонымен қатар, білім алушыларға  арнайы білім беру, сөйлеу, тілдік бұзылулар және инклюзивті білім беру тәжірибелері бойынша кеңес береді. Кәсіби мансабын мұғалім және білім беру бағдарламасының үйлестірушісі ретінде бастады. Оның ымдау тілі , сөйлеу және тілдік терапия бағдарламалары бойынша көпжылдық оқытушылық тәжірибесі мол. Сондай-ақ, есту қабілетінің бұзылуы, аутизм және СДВГ бағыттары бойынша ғылыми журналдардағы мақалалары, конференциялардағы баяндамалар және көптеген ұлттық, халықаралық басылымдары бар. Ол ағылшын, араб және неміс тілдерін меңгерген.  Бүгінде ол «Human Dignity» Арнайы білім беру қауымдастығының негізін қалаушы және президенті болып табылады. Жоғары оқу орнында өткізген үш апта ішінде профессор, жаңа ортаға тез бейімделіп, студенттермен жақсы тіл табысып үлгергенін атап өтті: «Мені университеттегі достық атмосфера мен студенттердің ашық мінездері баурап алды. Білім алушылардың барлығы дерлік ағылшын тілін жетік біледі».

Біздің оқу ордамыз Солтүстік-Батыс ауыл және орман шаруашылығы университетімен (Янлин қ., Қытай) 10 жыл бойы табысты ынтымақтастықта жұмыс жасайды. Бұл серіктестік «Бір белдеу, бір жол» халықаралық бастамасы аясында дамып келеді. Ынтымақтастық аясында Қытайдан 90 студент біздің университетте, ал Қозыбаев университетінің 30 студенті Солтүстік-Батыс ауыл және орман шаруашылығы университетінде білім алды. Биыл Қозыбаев университетінің 35 студенті ҚХР-ға барды. Бұл Қытайға жасалған ең ірі академиялық сапарлардың бірі. Болашақ агрономдар мен мал шаруашылығы мамандары ҚХР жетекші аграрлық университеттерінің бірінде оқуға, заманауи зертханаларда жұмыс істеуге және далалық зерттеулерге қатысуға мүмкіндік алды. 33 бакалавр агрономия, мал шаруашылығы өндірісінің технологиясы, өсімдіктер туралы ғылым және технология салалары бойынша оқиды. Сонымен қатар, осы оқу жылынан бастап екі магистрант Солтүстік-Батыс ауыл және орман шаруашылығы университетінде «Агрономия» және «Мал шаруашылығы өндірісінің технологиясы» мамандықтарының қос диплом бағдарламалары бойынша оқуларын  бастады. Олар алты ай қаламызда оқып, қалған 1,5 жылдық оқуларын Қытайда аяқтап, зерттеу жұмыстарын жүргізеді. Нәтижесінде жас мамандар екі диплом алады –қазақстандық және қытайлық. Солтүстік-батыс ауыл және орман шаруашылығы университеті- Қытайдағы негізгі университеттердің бірі болып табылады. Генетика мен дақылдарды өсіру, өсімдіктерді қорғау, ауыл шаруашылығы биотехнологиясы, су ресурстарын басқару және мал шаруашылығы салаларындағы ауқымды ғылыми-зерттеу мектептерімен танымал. Бүгінде ол Қытайдағы ауыл шаруашылығы ғылымы бойынша ең ірі ғылыми-зерттеу және білім беру орталықтарының бірі. Университеттер арасындағы ынтымақтастық ұзақ мерзімді және жан-жақты сипатқа ие. Қазіргі уақытта осы университетте Агротехнологиялық факультетінің үш жас оқытушысы докторантурада оқиды (1-2 курс), ал агрономия және орман шаруашылығы кафедрасының екі оқытушысы ғылыми тағылымдамадан өтеді. Ынтымақтастықтың маңызды бағыты- мамандарды тәжірибеге бағдарлау. Жыл сайын серіктестік аясында Солтүстік-Батыс ауыл және орман шаруашылығы университетінде мал шаруашылығының заманауи технологиялары бойынша тренингтер өткізіледі. Бұл сессияларға тек біздің университеттің оқытушылары ғана емес, сонымен қатар Солтүстік Қазақстан облысының Ауыл шаруашылығы және жер қатынастары басқармасының  мамандары да қатысады. Сәуір айының соңында университетке Солтүстік-Батыс ауыл және орман шаруашылығы университетінің жеті студенті, ал күзгі семестрде тағы шамамен 30 студент келеді деп жоспарланған.