Наурызнама  мерекелік онкүндігінің әр күні ұлттық құндылықтар мен белгілі бір тақырыпқа арналады. Мерекелік күндер тізбегі Көрісу күні – Амал мерекесімен бастау алады. Бұл күні халқымыз қыстан аман-есен шығып, көктемді қуанышпен қарсы алып, бір-бірімен қол алысып, төс қағысады. Адамдар өкпе-ренішті ұмытып, бір-біріне амандық, береке тілейді. Ақсақалдар ақ батасын беріп, тағылымды өсиеттерін айтады. Бұл атаулы күн өскелең жас ұрпақты мейірімділікке, ауызбіршілік пен татулыққа, бауырмалдық пен сыйластыққа тәрбиелейді. Көрісу күні әр шаңыраққа құт-береке, амандық пен бейбітшілік әкелсін!

Қозыбаев университетінің студенті Ербол Хамитов -2026 Паралимпиада ойындарында Қазақстан үшін алғашқы алтын медаль жеңіп алды. Хамитов парабиатлонда 4,5 км қашықтықта «із қуу» дисциплинасы бойынша спортшылар арасында алтын жүлдені жеңіп алды. Финалда қазақстандық спортшы 9 минут 39,0 секунд нәтиже көрсетіп, тек атыс алаңында қателік жіберді. Ербол Хамитов үшін бұл қазіргі Паралимпиададағы екінші медаль. Ол бұған дейін пара шаңғы жарысында 1500 метрлік классикалық спринтте қола жеңіп алған. Ербол Қозыбаев университетінде «Дене шынықтыру және спорт» мамандығы бойынша 4 курста оқиды. 2023 жылы Ербол Хамитов отырып шаңғымен сырғанау жарысынан Әлем чемпионы, ал 2025 жылы 12,5 км жеке жарыста әлем чемпионы және паралимпиадашылар арасында биатлоннан Әлем Кубогының жалпы жеңімпазы атанды. Бұл жетістік 31 жылдан кейін қазақстандық спорт үшін тарихи жеңіс болды. Соңғы рет «Хрустальный глобус» марапатын елге 1994 жылы шаңғышы Владимир Смирнов әкелген. Міне, бір жылдан кейін Ербол Хамитов спорттық Олимпиаданы бағындырып, ел үшін ерекше жетістік – алғашқы паралимпиадалық «алтын» жеңді!

«Қазатомөнеркәсіп» ҰАК» АҚ, Қозыбаев университеті және Аризона университеті өкілдерінің ғылым, технология және кадрларды даярлау саласындағы ынтымақтастықты дамытуға арналған жұмыс кездесуі өтті. Сыни минералдар, ядролық технологиялар және жаңа материалдар саласындағы ынтымақтастықтың  бағыттары талқыланды. Ғылым және технологиялар жөніндегі ұлттық кеңестің отырысында Мемлекет басшысы отандық атом саласын дамытуға үлкен көңіл бөлді. Президент ең алдымен осы саладағы кадрлық әлеуетті арттыру қажеттілігін  атап өтті. Бүгінде Қазақстан табиғи уранды әлемдік өндірудің шамамен 43%-ын қамтамасыз етеді және бериллий мен тантал сияқты сирек кездесетін металдарды  шығару бойынша өндірістік қуаттылыққа ие. Қазатомөнеркәсіп  - Қазақстанның ұлттық атом компаниясы және табиғи уран өндіру бойынша әлемдік көшбасшы. Мұндай жаһандық кәсіпорынмен ынтымақтастық Қозыбаев университеті үшін кең мүмкіндіктер ашады. Кездесуде тараптар атом энергетика саласындағы ынтымақтастық мүмкіндіктерін қарастырды, әсіресе жаңа буын мамандарын даярлауға баса назар аударылды. Іс-шара студенттер үшін өндірістік нысандарда тағылымдамалар мен практикалық сабақтарды ұйымдастыруға, сондай-ақ бірлескен білім беру және ғылыми бағдарламаларды жүзеге асыруға бағытталды. Қатысушылар университеттер мен өнеркәсіптік серіктестер арасындағы  ғылымды, білімді және жоғары технологиялық индустрияны біріктіретін ынтымақтастықтың жаңа моделін қалыптастыратынын атап өтті. Бұл серіктестік озық зерттеулерді дамыту, әлемдік деңгейдегі кадрларды даярлау және қазақстандық ғылымды жаһандық ғылыми-технологиялық кеңістікке біріктіру үшін қосымша мүмкіндіктер ашады.

Солтүстік Қазақстандық спортшы, Қозыбаев университетінің студенті Ислам Евлоев еркін күрестен 97 келі салмақ дәрежесінде Қазақстан чемпионатының алтын медалін жеңіп алды. Финалда Ислам жоғары деңгейдегі дайындықты, техникалық шеберлікті және жеңіске деген жігерін көрсетті. Мықты техникалық дайындықтың арқасында, ол астаналық Бағлан Қуанышты 8:0 есебімен жеңді. Бұл жеңіс бүкіл университет үшін маңызды жетістік. Ислам Евлоевқа халықаралық дәрежеде табыстар тілейміз!

Биотехнология бойынша қос дипломды бағдарламасының студенті Амир Агзамов Аризона университетінің ауыл шаруашылығы, өмір және қоршаған орта ғылымдары колледжінің (факультетінің) «Үздік түлек» атағын және ең жоғары марапатын алды. Бұл марапат әр семестрде әр мамандық бойынша бітіруші курстың  үздік студентіне беріледі. Биыл тарихта алғаш рет Қозыбаев университеті мен Аризона университетінің қос дипломды бағдарламасының  төртінші курс студенті «Үздік түлек» атанды. Аризона университетінің Өсімдік ғылымдары мектебі директорының міндетін атқарушы, доктор А. Элизабет Арнольд Амирге жолдаған құттықтау хатында: «Сіз биотехнология бағытында жақсы нәтижелер көрсеттіңіз. Біз сізді дарыныңыз бен көшбасшылық қасиетіңізді бағалап таңдадық. Бұл сіздің жоғары жетістіктеріңіз бен әлеуетіңіздің дәлелі. Барлық бағдарламалар бойынша үздік түлектеріміз жеке марапаттарға ие болды» Амир Қозыбаев университеті мен Аризона университетінде грант бойынша білім алады. Студенттер үш жарым жыл Қазақстанда және бір семестр АҚШ-та оқиды. Биыл ол алғашқы 29 студенттің  ішінде  Тусондағы негізгі кампусқа оқуға келді. Оқу барысында академиялық және ғылыми жұмыстардың жоғары деңгейін көрсетті. Амир Агзамов- мектеп кезінен бастап ғылым саласына қызығушылық танытты. Ол бакалавриатта оқып жүргенде Сауд Арабиясындағы Король Абдалла  атындағы ғылыми технологиялық университетінде (KAUST) және Сингапур Ұлттық университетінде тағылымдамадан өтіп, молекулалық биология саласында баға жетпес тәжірибе жинақтады. Амир жақсы оқып қана қоймай, зерттеулерге де қатысып жүрді. Таланттар байқауында өнер көрсетіп, тіпті жүлделі орынға ие болды. Сонымен қатар, басқа елдерден келген студенттерді қазақтың ұлттық аспабы - домбырамен таныстырды. Осылайша, белсенді студенттік қызметі мен жоғары академиялық жетістіктері оған «Үздік түлек» атағын алуға мүмкіндік берді. «Бұл марапат мен үшін үлкен тосынсый болды. АҚШ-та оқып  жүргенде «Үздік түлектер» марапаттау рәсіміне қатыстым. Алайда бұл марапатқа тек тікелей Аризона кампусында оқитын білім алушылар ұсынылады деп ойладым. Жетістіктерімнің Аризона университеті тарапынан мойындалғанына өте қуаныштымын. Бұл болашақта үлкен мақсаттарға жетуіме үлкен серпін берді. Өзімді ғылым бағытында үнемі дамытуға тырысамын », - деді Амир Агзамов. Енді биотехнология саласындағы қос диплом бағдарламасының үздік түлегі, 2026 жылғы түлек ретінде Амир негізгі деңгейде емес, колледж деңгейінде қосымша тану үшін бәсекелесуге мүмкіндік алды. Осыдан төрт жыл бұрын Қозыбаев университеті мен Аризона университеті арасындағы іске қосылған қос дипломдық бағдарламалар, бүгінде айтарлықтай нәтижелерді көрсетті. Бағдарламалар көкжиегі кеңейді: биотехнология, IT, білім берудегі инклюзия, бизнес және менеджмент салалары. Студенттер контингенті де өсті: Қазақстаннан ғана емес, сонымен қатар Америка Құрама Штаттарынан, Қытайдан және Ресейден студенттер қабылданды.

Университет ғалымдары ҚР жаңа Конституцияның жобасын талқылау үшін басқосты. Іс-шараға ғылым департаментінің қызметкерлері, жас ғалымдар кеңесі мен ғылыми-зерттеу орталықтарының мүшелері қатысты. Қатысушылар ұсынылып отырған өзгерістер мен толықтырулардың мәні туралы ойларын ортаға салды. «Болашақ референдумның басты мақсаты-елдің құқықтық және саяси жүйесін жетілдіру, сондай-ақ қоғамдағы әділеттілік пен теңдік деңгейін арттыру үшін жағдай жасау. Осы өзгерістер әрбір азаматқа негізгі саяси шешімдерді қабылдау процесіне тікелей қатысу үшін мүмкіндіктер ашады. Соның арқасында халық пен мемлекет арасындағы сенімнің өсуіне ықпал етеді», - деп атап өтті Ғылым және инновациялар жөніндегі Басқарма мүшесі Әнуарбек Қақабаев. Конституцияда алғаш рет білім, ғылым және инновацияларға ерекше назар аударылды, бұл қазақстандықтар алдында дамудың жаңа көкжиектерін ашады. Ғылыми кеңестің ғалым хатшысы Асемгуль Темирханова өз баяндамасында  Конституцияның жаңартылған мазмұны мен жаңа технологиялар дәуіріндегі ғылымның рөліне тоқталды: «Мемлекет басшысы ғылымды дамытуға айрықша мән береді. Мемлекеттің өркендеуі ғылым мен технологияға тікелей байланысты екені анық.Маман даярлау,ғылыми-зерттеулерді жүргізу ,жас ғалымдарға қолдау көрсету сыңды бағыттар бойынша әлі де атқаратын жұмыс баршылық. Бұл бағытта Қозыбаев университетінде мынадай қадамдар жасалды:ғылыми зерттеулерді өрістету, жас ғалымдарды қолдау, ғылым мен өндірістің байланысын күшейту, цифрлық және ЖИ саласын дамыту. Мұның барлығы болашақ экономиканың негізі деп білеміз». Оқу ордамыздың ғалымдары жаңа Конституциялық жаңартуларға қолдау білдіреді.

Қазақстан Республикасының Ғылым және жоғары білім министрі Саясат Нұрбек Қозыбаев университетінің  басшылығымен және Аризона университетінің білім беру серіктестігі жөніндегі аға директорымен жұмыс кездесуін өткізді. Кездесуде университеттер арасындағы халықаралық академиялық ынтымақтастықты дамытудың негізгі нәтижелері мен жаңа бағыттары талқыланды. Министрге Аризона университетімен бірге жүзеге асырылып жатқан бизнес және менеджмент саласындағы қос дипломды бағдарлама туралы ақпарат берілді. Бұл бағдарлама халықаралық білім беру стандарттарын дамытудағы және басқару саласындағы жаңа буын мамандарын даярлаудағы маңызды қадам болып табылады. Сондай-ақ, американдық университетпен маркетинг саласындағы бірлескен білім беру бағдарламасын іске қосу мәселесі талқыланды. Ол нарықтық талдау, цифрлық құралдар және халықаралық бизнес-процестер саласында заманауи құзыреттіліктерге ие мамандарды даярлауға бағытталған. Біздің жоғары оқу орындары арасындағы ынтымақтастық жобасы стратегиялық тұрғыдан жан-жақты дамып келеді. Бүгінгі таңда жоба ғылыми-зерттеу бағыттарының кең ауқымын қамтиды: материалтану, азық-түлік қауіпсіздігі, химия, су ресурстары және экология саласында бірлескен зерттеулер жүргізіледі. Университеттер озық зерттеулерді дамытуға, әлемдік деңгейдегі мамандарды даярлауға және қазақстандық ғылымды жаһандық академиялық қауымдастыққа біріктіруге бағытталған тұрақты халықаралық ғылыми-білім беру платформасын қалыптастырады.

Құқық қорғау органдарының өкілдері заң бұзудың салдарын фильм арқылы жеткізді. «Заң мен тәртіп» идеологиялық қағидаты аясында Қозыбаев университетінде студенттерге «Не книжные закладки» және «Хулиганка» атты қысқаметражды фильмдерінің көрсетілімі өтті. Бүгінгі таңда жастар арасында агрессия, қорқыту және психологиялық қысым зорлық-зомбылыққа әкелуі мүмкін. «Не книжные закладки» фильмі арқылы студенттерге заңға қарама-қайшы келетін әрекеттердің ауыр салдары түсіндірілді. Оқиға желісі жеңіл табысқа қызыққан жігіттің тағдырын арқау етеді. Ал екінші фильмде «бұзақы» ретінде танылған жасөспірімнің теріс әрекеттерінің астарында жатқан қорқыныш сезімі мен қоғамдық қысымның ықпалы көрсетіледі. Көрсетілімнен кейін білім алушылармен арнайы киноталдау ұйымдастырылды. «Себептері– салдары – қорытындылары – әрекеттер» әдісі арқылы фильм кезең-кезеңімен талқыланды. Пікірталас барысында білім алушылар бейнефильм кейіпкерлерінің іс-әрекеттеріне қатысты өз көзқарастарын білдіріп, қиын жағдайда өзгеге қолдау көрсету маңызды екенін атап өтті.

Қозыбаев университетінің студенті Ербол Хамитов халықаралық жарыста жоғары жетістіктерге жетіп, университетіміздің абыройын асқақтатты. Бүгін Милан-Кортина қысқы Паралимпиада ойындарында пара шаңғы жарысы бойынша Ербол 1500 метрлік классикалық спринтте (LW12) қола медаль жеңіп, 2 минут 29 секундта мәреге жетті Бұл жетістік- жай ғана спорттық жеңіс емес. Ерболдың табандылығы, еңбекқорлығы және өзіне деген сенімділігі Қазақстанның жас спортшылары үшін жарқын үлгі болып табылады. Ербол Хамитовтың бұл жетістігі бүкіл университет пен жастарға үлкен шабыт береді. Лайықты марапатыңызбен шын жүректен құттықтаймыз! Сізге жаңа жеңістер, мықты денсаулық және халықаралық деңгейдегі сайыстарда толағай табыстар тілейміз! Ербол Хамитов– біздің университетіміздің ғана емес, бүкіл еліміздің мақтанышы!

Солтүстік Қазақстан облысына сапары барысында ҚР Парламенті Сенатының Төрағасы Мәулен Әшімбаев аймақ жастарымен кездесіп, жаңа Конституцияның мүмкіндіктерін талқылады. Іс-шараға Қозыбаев университетінің студенттері де қатысты. «Жаңа Конституция жастар үшін мүмкіндіктер ашады. Әділеттілік, заң үстемдігі және тең мүмкіндіктер қағидаттарына негізделген. Бұл жастардың білім, еңбек және бастама арқылы өз әлеуетін жүзеге асыруына мүмкіндік береді. Негізгі Заң жобасында білім беру, ғылым, мәдениет және инновацияның басымдықтары, сондай-ақ шығармашылық еркіндік пен зияткерлік меншікті қорғау кепілдіктері бекітілген. Бұл дарынды, білімді және белсенді жастарды қолдау елдің дамуының стратегиялық басымдығына айналып келе жатқанын білдіреді. Сонымен қатар, жастардың өз жауапкершілігі мен тарихи өзгерістердің ауқымын түсініп, елдің қоғамдық өміріне белсенді қатысуы маңызды», - деп атап өтті ҚР Парламенті Сенатының Төрағасы Мәулен Әшімбаев. Кездесу барысында Қозыбаев университетінің екінші курс студенті, университеттің Студенттік үкіметінің президенті Асанали Жанатулы жаңа Конституция жобасы бойынша өз пікірін білдірді. Оның айтуынша, бүгінгі жастардың өмірі әлеуметтік желілермен тығыз байланысты. Сондықтан жаңа Конституция жобасында азаматтардың жеке деректерін қорғауға ерекше назар аударылады, бұл маңызды қадам. Сондай-ақ, жаңа конституциялық өзгерістерде мемлекет дамуының басты бағыты ретінде білімге, ғылым мен инновацияға басымдық берілгенін атап өтті. Студенттің пікірінше, білімді әрі жауапты жастар елдің тұрақты дамуына үлкен үлес қоса алады. ЖОО студенті және СҚО «Ассамблея жастары»  РҚБ аймақтық кеңсесінің жетекшісі Дарига Смаилова жаңа Конституция жобасы бойынша өз пікірін білдірді: «Құжаттағы белсенді және жауапты азаматтардың рөлі жастар үшін ерекше маңызды. Әрбір адамның жеке жауапкершілігі мен заңға, қоғамдық тәртіпке құрметінің арқасында еліміз дамып, өркендейді». Дарига Смаилова әлеуметтік және экологиялық бастамаларға белсенді қатысып жүргенін атап өтті. Оның айтуынша, жауапкершілік, бірлік және елдің болашағына қамқорлық сияқты құндылықтар жаңа Конституция жобасында бекітілген қағидаттармен толық сәйкес келеді.