Қытайдан келген 12 бакалавр және 10 магистр Қозыбаев университетінде тағылымдамадан өтті. Білім алушылар осы жылдың тамыз айында Қытайдың Солтүстік-Батыс ауыл шаруашылығы және орман шаруашылығы университетінің мал шаруашылығы және технологиялар колледжінен академиялық алмасу бойынша келді. Үш ай ішінде олар білім ордамызда ағылшын тілінде бейіндік сабақтарға қатысып, СҚО ауылшаруашылық құрылымдарында мал өсіруші мамандығының тәжірибесін меңгерді. Қытайлық студенттер жем-сүт зауыттарында, Шағалы кентіндегі Солтүстік Қазақстан ауыл шаруашылығы тәжірибе станциясында, Аққайың, Тайынша, Қызылжар аудандарындағы шаруа қожалықтары мен басқа да ауыл шаруашылығы кәсіпорындарында болды. Сонымен қатар, ғылыми семинарларға, шетелдік профессорлардың ашық дәрістеріне, халықаралық конференцияларға қатысты.
«Біз мұнда мал шаруашылығы, мал генетикасы, технология, ғылыми зерттеулер негіздерін оқыдық. Қазақстанның мәдениетімен жақынырақ танысып, жаңа достармен таптым. Мен үшін елдің мәдениеті, тарихы, тілі, тіпті тағамдары ерекше болып көрінді. Жалпы жақсы әсер алдым »,- деп бөлісті Қытайдан келген магистрант Жан Жипенг.
Қозыбаев университетінде оқуларын аяқтаған студенттер сертификаттарға ие болды.
«Академиялық ұтқырлықтың арқасында, Қазақстан мен Қытай арасындағы халықаралық ынтымақтастық нығаяды. Біздің еліміз «Бір белдеу, бір жол» бастамасын белсенді түрде қолдайды және сіздің осы бағдарламаға қатысуыңыз осы жаһандық тұжырымдаманы сәтті жүзеге асырудың үлгісі болып табылады. Үш ай бойы «Мал шаруашылығы өнімдерін өндіру технологиясы» білім беру бағдарламасы бойынша білім алдыңыздар. Студенттер мен оқытушылар тәжірибе алмасуға мүмкіндік алды»,- деді Мансұр Әлімханов, интернационалдандыру және халықаралық бағдарламалар Басқармасының мүшесі.
Университетіміз Қытайдың Солтүстік-Батыс ауыл шаруашылығы және орман шаруашылығы университетімен 2017 жылдан бері ынтымақтасады. Осы уақыт ішінде Қозыбаев университетіне 60-тан астам қытайлық студент келді. Өткен жылы 10 студентіміз Қытайда оқыды. Келесі семестрде білім алушыларымыздың жаңа тобын жіберу жоспарда бар.
