Евразия Групп Қазақстан компаниясының Digital Agroleaders студенттік байқауы аграрлық, инженерлік және IT салаларындағы жас мамандар үшін жаңа мүмкіндіктер ашуды жалғастыруда! Қуана хабарлаймыз: Қазақстанның түрлі жоғары оқу орындарынан шыққан 10 дарынды студент пен түлек — Digital Agroleaders 2024 және 2025 жылдарындағы жеке есеп жеңімпаздары — кәсіби сапармен Германияға, біздің халықаралық серіктесіміз John Deere компаниясына аттанды.
Бұл — жай ғана экскурсия емес, көптеген қатысушылар үшін алғашқы халықаралық сапар. Ол практикалық жаңалықтарға, саланың сарапшыларымен кездесулерге және агроиндустрияға арналған әлемдік жетекші технологиялардың қалай жасалатынын көруге толы.
Сапар бағдарламасында:
* John Deere компаниясының үш зауытына бару — өндірістік алаңдар бойынша таныстыру экскурсиялары
* Инновациялық шешімдермен айналысатын инженерлер мен мамандармен кездесулер
* Инженерлік ойлау мәдениеті мен өндірістік үдеріске терең үңілу
Және, әрине, кәсіби дамуға қуатты мотивация
Біздің факультеттен жыл сайын студенттер қатысып, жеңіске жетіп жатқаны ерекше қуантады — бұл шынымен де тиімді, әрі шабыттандыратын формат. Бұған дейін біздің факультеттен шыққан жеңімпаздар Германияда болып қайтқан.
Биылғы қатысу — ерекше мәнге ие: «Агрономия» білім беру бағдарламасының 1 курс магистранты Ғабдуллин Алдияр байқаудың екі дүркін жеңімпазы атанды. Ол алғаш рет бакалавриаттың 3 курсында студент ретінде Германияға сапар шексе, биыл — магистрант, әрі компанияның қызметкері ретінде аттанды. Бұл — байқауға қатысудан басталған кәсіби өсу мен мансаптық қалыптасудың жарқын үлгісі.
Евразия Групп Қазақстан компаниясына және Eurasia Education жобасына студенттердің өзін көрсетуіне, кәсіби өсуіне және көкжиектерін кеңейтуіне мүмкіндік беретін ерекше білім беру кеңістігін құрғаны үшін шынайы алғысымызды білдіреміз.